ކައިޓް 13 ގައި ކުޅޭނީ 8 އަ ސައިޑް
ޒުވާނުންގެ މެދުގައި ކުޅިވަރުގެ، ޚާއްސަކޮށް ފުޓުބޯޅައިގެ، ޝައިޤުވެރިކަން އިތުރުކޮށް ގިނަ ޒުވާނުން އެއް ޢާޒުމެއްގައި މަސައްކަތްކުރުމުގެ ރޫޙު ޢާލާކޮށް ދިރުވުމުގެ މަޤްޞަދުގައި ކުރިއަށް ގެންދިޔުމަށް ހަމަޖެހިފައިވާ ފުޓްބޯޅަ މުބާރާތް މިފަހަރުވެސް އެއިޓް އަ ސައިޑް ގެ އުސޫލުން ކުރިއަށްގެންދިޔުމަށް ނިންމައިފިއެވެ. މިގޮތަށް ނިންމާފައިވަނީ މިކަމާ ބެހޭގޮތުން ކުރެވުނު ބަހުސްތަކަކަށް ފަހުގައި، މުބާރާތް ހިންގުމުގައި އަމަލީގޮތުން ބައިވެރިވާ ފަރާތަކުގެ މެދުގައި ނެގުނު ވޯޓަކުންނެވެ.
ކާށިދޫގެ ގިނަ ޢަދަދެއްގެ ޒުވާނުން ބޭނުންވަނީ ފުޓްސަލް މުބާރާތެއް ބޭއްވުމަށެވެ. ފުޓްސަލް ބާއްވާނަމަ މުބާރާތުގައި ބައިވެރިވާ ޓީމުތައް ގިނަ ވާނެކަމަށް ލަފާކުރެވެއެވެ. ނަމަވެސް ޢީދު ބަންދުގައި ލިބެނީ ވަރަށް މަދު ދުވަސްކޮޅެކެވެ. އެހެންކަމުން ބަންދުތެރޭގައި ހުރިހާ މެޗެއް ކުޅެ ނިމޭވުރުވާނެހެން ހީނުވާތީ އެގޮތަށް ނިންމީކަމުގައި މުބާރާތް ހިންގުމުގައި އިސްކޮށް ހަރަކާތްތެރިވާ ފަރާތުން ބުނެއެވެ. އަދި ފުޓްސަލް މުބާރާތެއް ހިންގުމަކީ ވަރަށްވެސް ބޮޑު ޚަރަދެއް އެކަމުގައި ހިނގާނެކަމަކަށް ވާތީ އެކަން މިފަހަރު އެގޮތަށް ކުރެވެން ނެތީކަމަށްވެސް އެފަރާތުން ހާމަކުރެއެވެ. ނަމަވެސް އެންމެ ބޮޑު މައްސަލައެއްކަމަށް އެފަރާތުން ފާހަގަކުރަނީ މުބާރާތް ހިންގަން ލިބޭ މުއްދަތު ކުރުވުމެވެ.
ކާށިދޫ ޔޫތް ޓްރޮފީ 2013 ހިންގުމުގައި އަމަލީގޮތުން ބައިވެރިވާ ޓީމުތަކުން ގެންދަނީ މިއީ ކާމިޔާބު މުބާރާތަކަށް ހެދުމަށް ވަރަށް ގިނަ މަސައްކަތްތަކެއް ކުރަމުންނެވެ. އެގޮތުން އެފަރާތުން އިއްޔެ ވަނީ ކާށިދޫ ކައުންސިލާވެސް ބައްދަލުކޮށްފައެވެ. މިބައްދަލުވުމުގައި ކައުންސިލްގެ ހުރިހާ މެމްބަރުންވަނީ ބައިވެރިވެފައެވެ. އަދި މިކަމަށް ކައުންސިލަށް ވެދެއްވެން އޮތް އެހީއެއް ވެދެއްވާނެކަމުގައި ކައުންސިލުންވަނީ ބުނެފައެވެ.
